Götuna fram eftir veg

2006-04-13T09:45:00.000Z

513CE46A7A2D2A2A6A54E217BEDB959E

Fluttur enn og aftur...

2006-04-12T08:52:00.000Z

Ég ætla að flytja mig á nýja mbl.is bloggsvæðið:

http://harhar.blog.is

Kveðjur góðar, Halli

Að loknum 10 vikum..

2006-04-08T22:49:00.000Z

Þá er 10 vikna æfingakafla lokið með 10 km Flóahlaupi í dag. Hlaupið gekk svipað og lagt var upp með að halda 4 mínútna pace fyrstu 6 og svo auka hraðann. Kláraði á 39:46 sem er PB og þetta á ekki að hljóma ílla (þó það geri það nú svolítið), þarna er talsvert meiri innistæða. Það sem skyggir svolítið á gleðina er að eftir að búið var að kasta mæðinni í eina mínútu, þá kom greinilega í ljós að vinstrikálfinn var ekki góður og nú liggur fyrir að ég hef tognað í hlaupinu. Enn tvær vikur til stefnu svo ekkert þýðir að hengja haus að svo stöddu. Voltarin, kælingar, síðar hitanir og kælingar og sjúkraþjálfari gera kraftaverk.

Þegar upp er staðið og horft er yfir þessar 10 vikur þá má ljóst vera að álagið hefði mátt vera heldur meira en raun ber vitni, en þetta er lífið, einfaldlega ýmislegt sem setur strik í reikninginn svo niðurstaðan er þessi: v12 67km, v11 52km, v10 85km, v9 69km, v8 73km, v7 65km, v6 90km, v5 71 km, v4 96km og loks v3 62km. Á móti kemur að þó magnið hafi kanski verið svona heldur í minna mæli, þá hafa gæðin verið til staðar og hver gæðaæfingin rak aðra, þar sem tempó útihlaup skiptust á við sprettæfingar í nýju Frjálsíþróttahöllinni undir styrkri stjórn Foringjans. Á þessum æfingum hefur gamla keppnisskapið verið manns stoð og stytta, þó sumir geri kanski létt grín að því, en svona er þetta bara og þessvegna tekur maður á í fyrsta spretti eins og þeim síðasta, en spáir ekki sérstaklega í að það eru 9 sprettir eftir þegar sá fyrsti er búinn.

Nú eru tvær vikur eftir þar sem planið var að skera hlaupa magnið snöggt niður og nú gerist það af íllri nauðsyn og væntanlega lítið hlaupið þessa vikuna, kanski maður setjist á hjólhnakk í staðinn eða jafnvel geri það óhugnarlegasta af öllu.. syndi.

Kaldir vetrar dagar..

2006-03-25T23:42:00.000Z

Köld vika liðin undir lok, sem endaði með hálfu maraþoni í Marsmaraþoni FM. Maður er góðu vanur í vetur þar sem frost hefur verið sjaldséður gestur. Núna þarf maður að búa við 1 – 4 stiga frost og allt ætlar um koll að keyra úr kulda. Þokkalega hlaupinn í vikunni þar sem t.d. var tekið vel á því i Höllinni á fimmtudaginn með 10*400 metra sprettum með 200 m. rólegum á milli. Svolítið væl aftan í hægra læri og í hægri kálfa svo ég leyfði mér að draga mig út úr “eftir” æfingunum hjá Foringjanum. Fann ekkert fyrir því í dag, enda magnað hvað einn hvíludagur gefur mikið.

Eftir hrakfarirnar miklu í Poweraidhlaupinu í um daginn lögðust allir á eitt um að telja mér trú um að fara nú hægt af stað í dag eða segjum skynsamlega. Vera á maraþon-pace, sjá svo til á baka leiðinni. Nú nú, þar sem ég er hlíðinn og vel upp alinn þá reyndi ég það eftir fremsta megni, en var þó nokkuð ákveðið 10 sekundum of fljótur miðað við áætlanir. Svolítið bætti ég í þetta á leiðinni heim, en var samt tiltölulega jafn allt hlaupið. Greining á deginum er að það var kalt, 4,30 pace er möguleiki í London, hlaupið var 300 - 400 metrum of langt, hlaupið tók 1, 32:30 sem er PB, Silvía rúlar, aumingja Geir, Aston Villa gerði jafntefli, dökki páskabjórinn er góður og ég verð að kaupa mér ASICS® GEL -DS Trainer® XI í næstu viku.

5 vikur eftir..

2006-03-20T00:14:00.000Z

Langt um liðið síðan ritað var hér síðast. Eftir viku from “hell” hefur þessi vika verið fín, 90 km kláraðir og almenn líðan góð og veður með eindæmum. Núna eru 2 vikur eftir þar sem enn verður reynt að bæta við magni og gefa allt á æfingum, síðan gírar maður þetta niður þar sem 3 vikur verða í markmiðið með þessu öllu – London maraþon. Næsta vika mun gera aftur rétt um 90 km, þar sem hápunkturinn verður hálft maraþon í Marsmaraþoni FM. Vikan þar á eftir gerir síðan samkvæmt plani 100 km, þar sem hápunkturinn verða 35 km. Eftir það er planið frekar autt ennþá, þarf eiginlega kynna mér það betur hvernig fólk hagar sér þessar síðustu 3 vikur, en það kemur væntanlega allt í ljós.

Hefði viljað skrifa ýmislegt um brottför Bandaríkjahers, annað en “gleði, gleði, gleði”. Verð þó aðeins að vitna í hið virta stórblað Morgunblaðið frá í dag. Í Reykjavíkurbréfi dagsins er verið að reyna finna því stoð að 4 og ekki minna en 4 orustuþotur séu nauðsynlegar til varnar landinu, allt annað sé barnaskapur og ábyrgðarleysi.

Fyrri tilvitnunin kemur úr texta um að allar þjóðir hafi ákveðna skoðun á varnarþörf sinni og því hljóti það gilda hér.

“Þau telja sig öll hafa þörf fyrir sýnilegar og virkar loftvarnir, bæði til að fylgjast með umferð ókunnra flugvéla um lofthelgi sína og til að geta brugðizt við árás, ekki sízt hryðjuverkaárás” Halló?!?!? Skildu New Yorkbúar, Madridingar eða Lundunarbúar kaupa svona logik. Ætli þeir hefðu ekki frekar kosið öflugra borgaralegt eftirlit.

Seinni tilvitnunin kemur aðeins síðar í textanum og takið sérstaklega eftir síðustu setningunni.

"Fjórar þotur geti gert það erfitt að gera árás óhindrað, t.d. ef lítill hópur árásarmanna tæki hér land með ákveðið skammtímamarkmið fyrir augum, en búast megi við að Íslendingar hafi áhyggjur af slíku. Því má raunar bæta við að Íslandssagan sýnir mætavel hversu viðkvæmt landið getur verið fyrir slíkum árásum." Veldur “innrás” Jörundar hundadagakonungs ennþá svefnleysi á ritstjórnarskrifstofum Morgunblaðsins?!?!?

Ég trúi því ekki fyrr en á reynir að Morgunblaðinu takist næstum einhendis að framlengja þetta hernaðarbrölt á Miðnesheiði. Ég get ekki varnað þessari hugsun að koma fram “Er ekki kominn tími á Styrmi og hugarfar hans?”

Jæja..

2006-03-09T23:49:00.000Z

Þetta var hræðilegt.. ég er að tala um Powerade.. gjörsamlega glórulaust, svo það sé sagt. Tíminn að sjálfsögðu í samræmi við það ca. 43:20 sem er nú ekki alveg eins og lagt var út með. Þó langt sé um liðið síðan ég keppti síðast í 10K hlaupi, þá fer þetta í minninguna sem það versta hingað til. Meira segja verra heldur en 1. maí hlaup Fjölnis 2003 sem haldið var í 4 gráðum og norðaustan báli. Nenni ekki útlista þetta í smáatriðum, en tökum það jákvæða úr þessu, sem var þrældómurinn að klára. Þessi vika er ekki að gera sig, eins gott að laugardagshlaupið verði sem blómstrið eina.

amatör eða..

2006-03-08T23:24:00.000Z

Sökum umferðarteppu í Ártúnsbrekkunni sem náði allt að ljósunum hjá Vogaskóla, sá ég mér þann kost vænstan að mæta hjá Laugaskokk í dag, enda með seinni skipunum eins og svo oft áður. Rétt náði Pétri og félögum sem voru farin af stað þegar ég hafði loks fundið bílastæði.

Markmiðið var að taka það rólega í dag og því hentaði 13 km skokkið hjá Pétri ágætlega.
Veður var glimrandi, logn og sól í heiði eða hafi. Það sem ég vil þó færa til bókar er að nú veit ég hver Agga er í persónu en hafði vitað af henni sem bloggara í nokkurn tíma. Greinilega kjarnorku kona sem allir geta kynnt sér með því að kíkja á bloggið hennar. http://blog.central.is/gmb

Jæja stefnan er tekin á síðasta Poweradehlaupið í vetur, annað kvöld (má maður þá ekki örugglega mæta á lokahófið???). Hefði ég tjáð mig um markmið um síðustu helgi, hefði ég verið drjúgur mjög, eins og ég á uppruna til, en þar sem ekki lengur er síðasta helgi þá verð ég að vera jarðbundnari með markmiðssetningu..... nei hvaða frístundahópiamatörshlauparakjaftæði er þetta..... 40 mínútur!!! Slegið.

hohhh

2006-03-07T23:07:00.000Z

Það var einn af “þessum” dögum í kvöld þegar ég fór að hlaupa. Ónýtar lappir, sem ekkert vildu og ekkert gátu, en fengu þó litlu ráðið. Tók hring frá Laugum upp á Langholtsveg, Elliðaárdalur að Árbæjarlaug og til baka með pínu krúsidúllu í lokin til að ná 15 km. Ég var eiginlega þokkalegur síðustu 2 kílómetrana. Ahh en þetta var puð og andlaust en það þíðir ekkert að vera í tómri vorkunn og aumingjaskap.. jeg kommer stærkt tilbage i morgen. Nohh er maður farinn að tala dönsku, þá held ég að sé orðinn ruglaður... ekki að það séu endilega stór fréttir í sjálfu sér.

Aðstæður fínar, en hefði ekki mátt vera mikið síðar á ferðinni því það gerði mjög lúmska hálku í kvöld á götum og gangstéttum, þó bíllinn segði 2 gráður í plús. Læt þetta duga í bili.. og þó.. fór 10 km í gærkvöldi á bretti (var nú heldur ekki í geggjuði stuði þar).

Í sól og vetraryl..

2006-03-04T23:47:00.000Z

Það var heiðskýrt, logn og 5 stiga frost í morgun, þegar Larsen-hópurinn lagði af stað frá tækjunum. Mættir voru undirritaður, Foringinn, Stefán, Ingibjörg, Alli, Gautur, Golli, Kalli og Birgir sem reyndar hlaupur ekki oft með Larsen en þar sem hann er prúður drengur mjög og ágætur hlaupari, þá voru ekki sérstakir annmarkar á því að hann væri með. Hlaupaleið var norðurströnd Reykjavíkur að JL-húsi þar sem tekinn var krókur í gegnum KR-svæðið yfir á Ægissíðuna. Hún farinn inn í botn og út Kársnesið, Smáratorg, Smiðjuhverfi og heim - 31 km og tíminn vafalaust ágætur.

Þrátt fyrir einmuna veðurblíðu í vetur til hlaupa, verður þetta að teljast fyrsta laugardagshlaupið í glampandi sólskyni síðan bara ég veit ekki hvenær... allavega á árinu, enda er ekki laust við að eftir klukkustund í potti í framhaldinu og yfirlegu yfir Aston Villa – Portsmonþ (sem mínir menn unnu sannfærandi 1 – 0), þá sé maður bara með léttan roða.

Hlaupið gekk annars ágætlega og maður virðist rúlla þessa rúma 30 km án mikillar fyrirhafnar sem er fínt því innan við tólftímum áður hafði ég hlaupið 10 km í Laugum og klárað næstum maraþon á 14 tímum. Tempóið í dag var mikið til rétt um 5, en geri ráð fyrir að sperra mig svolítið á næsta laugardag og reyna að taka síðustu 10 – 15 á maraþonhraða og sjá hvernig það gengur.

SkÁL Húsvíkingar

2006-03-02T23:16:00.000Z

Afsakið litlar skriftir, ástæður þess eru tvær, annarsvegar of stuttur sólarhringur og hinsvegar nenni ég stundum að ekki skrifa sem er eiginlega afleiðing af fyrr ástæðunni. Jæja nóg um það. Eitthvað er nú búið að hlaupa í þessari svölu en björtu viku. Mánudagurinn var tekinn með hefðbundnum látum þar sem keyrt var síðari helminginn á kringum 4 í pace. Mánudagur 11 km. Nennti þessu ekki á þriðjudaginn... já ég veit, það er bannað, en svona var það. Brekkusprettir í nýrri “brekkusprettabrekku” á miðvikudaginn, almenn ánægja með þá ákvörðun. Þetta er stígurinn við aðkeyrsluna að Grafarholtsvellinum. Fyrst teknir 5 * “að fimmta ljósastaur” og síðan 2 * “að tíunda ljósastaur”. Þetta var töff enda sat þetta í manni í kvöld. Æfingin gerði 10 km. Í kvöld var það höllin með 6 * 600 m og hring á milli og einni mínútu. Verið að keyra þetta á 1:55 – 1:59 sem er bara talsvert puð um þessar mundir. Æfingar á beinu brautinni í framhaldi og síðan 2 * 50 magi og loks 50 armbeygjur... ok loks loks 5 hringir rólegir á braut. Pakkinn gerði 10,5 með upphitun úti.

Jæja þá er blessaður bærinn minn við víkina sem kennd er við hús búinn að fá grænt ljós á hagkvæmni skoðun fyrir nýtt álver. Sá félagana káta í sjónvarpinu og sannarlega samgleðst maður með þeim. Eiginlega ekki hægt að útskýra það fyrir Reykvíkingum hvað þetta er landsbyggðinni mikilvægt sem hafa lifað samfelda gróskutíð í aldarfjórðung meðan jafnt og þétt hefur svorfið að landsbyggðinni að sjálfsögðu af ýmsum ástæðum. Ég var spurður 1974 hvað byggju margir á Húsavík og ég sagði 2500 og þar sem 2500 er falleg tala hef ég sagt hana síðan enda hefur þetta rokkað plús mínus 50 manns síðan þá. Ef af álveri verður á það eftir hafa gríðarlega jákvæð áhrif á svæðinu og maður sér fyrir að flug muni hefjast aftur til Húsavíkur og jarðgöng verði gerð í gegnum Vaðlaheiðina. Ýmsir sem þekkja mig, vita væntanlega að ég hef nú ekki verið álsinni númer eitt á Íslandi, þess vegna vil ég bara árétta það sem ég hef oft sagt – ef eðlileg ávöxtunarkrafa er gerð á byggingar raforkuvera og ekki sökkt perlum landsins, þá er þetta í góðu lagi, en annars ekki! Ég gæti masað hér um þetta málefni til morguns, en þar sem ég nenni því ekki og þið nennið ekki að lesa það, verður því sleppt.

Larsen

2006-02-27T12:57:00.000Z

Verð að afsaka þennan dusilhátt við skriftir. Engin skýring til á málinu önnur en leti. En þetta er helst í fréttum.

Að vanda var hlaupið inni í fimmtudaginn og þar tekið á því af krafti. Ingólfur ofurhlaupari mætti í fyrsta sinn á inni æfingu, sem hafði það í för með sér að keppni á brautinni jókst enn. Eftir 5*800 m spretti, voru ýmsar æfingar gerðar á 60 m. brautinni. Hrólfi virðist vera fyrirmunað að gera eins og Foringinn segir, enda var hann sá eini sem ekki hafði strengi á laugardaginn eftir æfinguna.

Laugardagurinn rann upp með blíðu sem var mjög við hæfi þar sem stefnan var tekin á Rauðavatnið, Rauðhólana og Heiðmörk. 25 km túr sem ég endaði á að taka síðustu 8 km á 4 – 4.10 í tempó. Það skal tekið fram að þetta var niður Elliðaárdalinn og að Gullinbrú. Eftir laugardagshlaupið dúkkaði Larsen upp á borð og var þá jafnframt tilkynnt ég væri kominn með stöðu lærlings í Larsenhópnum. Mikill heiður það.

Alvöru slagviðri..

2006-02-22T22:23:00.000Z

Ég lét hafa það eftir mér á æfingunni í dag að betra væri að hafa rigninguna með þegar svona vindrass væri í gangi, það einhvernveginn upplifðist ferskara að láta rigninguna lemja sig í leiðinni. Þetta var sem sagt veðurástandið í dag, en hlýtt sem á dæmigerðum sumardegi í borg vætunnar eins og við kölluðum Reykjavík stundum fyrir norðan. Tók á því á hlaupunum þar sem meðal annars var hlaupið 6*2 mín á tempó og 2 mín. hvíld á milli. Ég var ferskari en í gærkvöldi sem er í rétta átt. Magn 10,8 km.

Eins og oft áður kíkti ég áðan á heimasíðu Björns Bjarna, enda veitir hún innsýn í lífssýn sem er mér að flestu leiti algjörlega framandi og maður hefur alltaf gott af því að kynna sér framandi hluti. Jæja.. þetta segir BB "Stjórnmálasagan verður oft tilefni sjónvarpsmynda eða leikrita, þó átti ég ekki von á, að nokkrum hefði dottið að gera leikrit um stofnun og upphafsár Evrópusambandsins, en slíkt leikrit er nú sýnt í Hampstead-leikhúsinu í London. Ég gaf mér ekki tíma til að sjá það, enda gæti ég ímyndað mér, að margt efni annað væri meira spennandi - en leikritið byggist á störfum Roberts Schumanns, utanríkisráðherra Frakka, á sjötta áratugnum, sem ásamt Jean Monnet er talinn höfuðarkitekt Evrópusambandsins." Þetta er alveg ótrúleg ummæli (framhaldskólaleg?!?!?), séð í ljósi þess að stofnun EB er talinn hornsteinn þess að friðar sem staðið hefur milli landa EB frá síðari heimstyrjöldinni, þó annað sé ekki nefnt. BB hefði væntanlega troðið sér framfyrir í röð til að fá miða á stofnun Nato.

Voðalega getur þetta verið erfitt..

2006-02-21T21:57:00.000Z

Það var þreyttur og ekkert sérlega vel upplagður maður sem steig á hlaupabretti í Laugum í kvöld. Hægri kálfin að væla eins og stundum áður, svo sem ekkert sem ég hef áhyggjur af, bara smá pirrandi. Var með augun á leik Madridar og Arsenal og eyrun tengd við Kastljósið sem var ágætis blanda. Hlaupin gengu samt voðalega þreytulega og eftir 10 km nennti ég ekki meir og brölti í teygjurnar.

Jæja þá er Kastljósið og ríkisskattstjóri búin að votta að skattar hafa hækkað á 75% af launafólki en lækkað á 25% launafólks.

Spurning dagsins er þessi:
"Á hvaða hluta launþega hafa skattarnir lækkað?"

Svar möguleikar:
a) þá sem hafa laun í hópi lægstu 75% launþega
b) þá sem hafa laun í hópi hæstu 25% launþega
c) öryrkja og ellilífeyrisþega

Alvöru vindur

2006-02-20T21:11:00.000Z

Ég tók 8 km í gær, svona til að ná stífleikanum úr sér, koma líkamsstarfseminni í lag eftir Júróvision sullið kvöldið áður og ekki síst til að nýta frábært veður. Tók skokk með sjónum niður í Lækjargötu og gömlu Miklubraut heim. Hlustaði á Hemma Gunn á leiðinni og verð að segja að eru ekki margir sem jafnast á við hann í fjölmiðlunum í dag.

Mætti of seint á æfinguna í dag og tók það mig 2 - 3 km að ná fremsta fólki. Þetta er auðvitað ekki gott upplegg fyrir æfingu að stökkva út úr bílnum og spretta af stað, en þar sem maður er félagsvera þá vildi ég ná “mínu” fólki hið fyrsta. Ekki verður sagt að það hafi verið lygnt í dag, það var eiginlega talsverður belgingur þó hlýtt væri. Leiðin frá ströndinni upp að Egilshöll og síðan aftur upp “Húsafjallið” var með vindinn beint í fangið sem gerði hratt tempó ómögulegt, en þetta var djöfull erfitt og þá væntanlega rosalega hollt og gott. Vogurinn heim á lensinu var ljúfur sem blómstrið eina. Æfingin gerði 11 km, með smá hringsóli við Hamraskóla sem sumum þótti undarleg hegðun, en fjandinn hafi það, ég gat ekki farið að skilja 10, 85 eftir á Garminum.

Það er ekki spyrja af því með félagið mitt í Englandi – Astonv Villa, eftir að hafa komist í 1 – 0 óverðskuldað á móti Man City í bikarnum og maður hélt að þetta væri komið í höfn, þá jafnar City á 94 mínútu. Hvernig væri að dekka í föstum leikatriðum. City náði skalla á mark í þeim öllum allan leikinn.

Sá síðan áðan á netinu að Völsungar lentu í 2. sæti á Íslandsmótinu í knattspyrnu innanhús í 3. flokki, núna um helgina. Töpuðu fyrir Selfoss í úrslitaleik, en höfðu á leiðinni í hann t.d. unnið Fylki 5 - 1. Áfram Völsungur.

Tóm gleði...

2006-02-18T19:52:00.000Z

Ég er eiginlega alveg upprifinn eftir hlaup dagsins. Fyrir rétt mánuði skrönglaðist ég 27 km og var varla að hafa það af, að klára heim. Í dag er ég að hlaupa 35 km og enda með því að auka tempóið síðustu 5 km í 4,30 í pace og renn þetta ljúft heim. Ljóst að æfingar Foringjans eru farnar að kikka inn. Aðstæður voru eins og best verður á kosið í dag, hægur vindur, hiti 5 gráður og skýjað, stundum smá súld. Mættir voru Foringinn, Stefán, Kalli, Ingibjörg, Gautur og Golli sem reyndar tók Fossvoginn heim. Leiðin var frá Gullinbrú inn í Kópavog og ströndin kringum Kársnesið, Ægissíðan og haldið áfram að vestur á Lindarbrautina, loks fylgt norður strönd Reykjavíkur inn að Gullinbrú aftur. Garmurinn minn sagði: 35,16 km, avg pace 5,27 (inniheldur nokkur stopp vegna vatnsáfyllinga og klósettferða), Run time 3,11 klst og Calories 3.437!!!

Þar sem ég sit hérna núna skal ég þó viðurkenna, að dagurinn hefur tekið töluverðan toll og spurning hvað þarf að fara ofan í mig til að rífa mig upp. Treysti á að flutning Silvíu Nætur í kvöld ef í harðbakkan slær. Ætla rétt að vona að hún taki þetta í kvöld. Auðvitað á maður fulltrúa þarna, hana Birgittu Haukdal sem maður þjálfaði í handbolta hér á árunum á Hú og lagði um leið grunninn að söngferli hennar...... nei ok ég missti mig smá varðandi söngin, en þrátt fyrir að átthagafjötrarnir segi talsvert til sín, þá gengur bara ekki að kjósa hana, því lagið er svo arfa slakkt. Hún hefur þó aldrei litið betur út blessunin, sem er afrek út af fyrir sig, því ekkert hefur nú útlitið verið henni fjötur um fót.

kuldaboli mættur

2006-02-16T22:10:00.000Z

Þess var svo sem ekki að vænta, að veðrið héldist jafn gott og raun bar vitni. Svolítill blástur í gær og kuldi, en ekkert til að hafa áhyggjur af, enda reyndist æfingin skemmtileg og töff. Fartleikur í gangi, sem alltaf bíður upp á óvæntar uppá komur og umræður, þegar reynt er að hafa áhrif á þann sem ræður næsta hluta hlaupsins. Æfingin gerði 11 km.

Inni æfing í kvöld (eins gott, ískalt úti og rok) þar sem píramídi var tekinn 200 - 400 - 600 - 800 - 800 - 600 - 400 - 200 metrar með einum rólegum hring á milli, plús 2 mínútum í pásu milli 800 m. hlaupanna. Góður gangur í þessu og talsverð keppni milli mín, Hrólfs og Kalla. Nauðsynlegt að hafa smá keppni í þessu, en það skal vera fært til bókar, að það fer frekar í pirrurnar á mér þegar sumir eru alltaf byrjaðir 10 metra á undan mér og stytta svo inn á völlinn til að fara fram úr í stað þess að fara uppfyrir, það geri ég aldrei. Þeir sem það gera eiga að fá refsingu, útskúfun og vera ataðir tjöru og fiðri frá hópnum eða mér. En auðvitað er þetta bara æfing ... bla bla bla.. :-). Hljóp 3 km á undan, æfingin gerði 7 km plús, þannig að skráðir verða 10 góðir km í dag.

Glæsileg framtíðarsýn

2006-02-15T00:09:00.000Z

Fór í Laugar í kvöld og hljóp 10 km á bretti og horfði í leiðinni á Liverpool vinna Arsenal, Fréttir og veður á RÚV og þátt um lýtaaðgerðir á Stöð2. Var að lulla þetta fyrst á 5, síðan 4:45 og loks 4:30 í restina. Þetta voru eiginlega mistök að vera inni, því veðrið klukkan hálftíu í kvöld var glæsilegt, logn og heiðskýrt sem var eitthvað sem ég hafði ekki gert ráð fyrir þegar ég fór út.

Sá mynd af framtíðarsýn Björns í WC varðandi Laugar og Laugardalslaugina á vegg á leiðinni út. Hún er glæsileg! Í stuttu máli þá er gert ráð fyrir Hóteli þar sem stúkan er, nýju íþróttahúsi milli Lauga og Hótelsins. Allar byggingar mynda hring í kringum nýja laug sem væri í hring í kringum eyju sem væri undir gleri að hluta með minni "inni"laug og tveimur stórum rennibrautum. Flott hugmynd sem vonandi rís hið fyrsta. Skilst að gamla laugin sé ónýt, stúkan er ónýt og svæðið milli stúkunnar og Lauga klúður.

Sá í fréttum að Bretar eru búnir að ákveða reykingabann og þá er England, Skotland og Írland að verða reyklaus (sum orðin), snilld. Ég er í miklum vafa að það takist í vetur að koma því í gegnum íslenska þingið. Maður ætti að mæta með kúadellu í poka inn á skemmtistað og opnan og njóta ilmsins. Ætli manni yrði ekki hent í út í hvelli og talinn klikkaður, þó ilmur af kúadellu hafi engann drepið hingað til.

Var einhvern að tala um veðrið..

2006-02-13T23:20:00.000Z

Hafi veðrið verið gott á laugardaginn, þá var það bara klikkað núna seinnipartinn. Maður fagnar hverjum degi sem kemur af þessum gæðum á þessum árstíma. Svolítið að sperra mig á hlaupunum í dag. Eftir rólegan einn og hálfan km, þá gaf ég í hljóp næstu 7 km á meðal "peisi" í kringum 4 mín/km. Rúllaði restina hægar. Vegalengd 11 km. Nú er bara að safna fullt af km í vikunni, þó spáin fyrir næstu 2 daga sé kanski ekki "optimal".

Kátur með úrlitin í prófkjörinu hjá Samfylkingunni, get varla beðið eftir að þeir Dagur og Vilhjálmur fari að mætast í aðdraganda kosninganna. Held að Sjallarnir ættu að fara varlega í að lýsa yfir sigri fyrirfram í borgarstjórnarkosningunum í vor.

Annars er magnað að lesa bloggið hjá Birnir Bjarna. Eins og oft áður eru fjölmiðlar á Íslandi góðir við Samfylkuna og vondir við Sjallanna, að mati BB:

"Fjölmiðlaumræður um niðurstöður prófkjörs Samfylkingarinnar í Reykjavík eru dálitíð spunakenndar, svo að ekki sé meira sagt. Fjölmiðlafólk skautar framhjá atriðum, sem hefðu örugglega verið gerð að aðalatariði, ef aðrir ættu í hlut"?!?!?

Ætli BB sofi vel í þessari "paranóju" sinni.

Veðrið.. það er bara snilldin ein

2006-02-12T00:35:00.000Z

Gæða æfing í dag með Larsen-hópnum. Veður náttúrlega gríðarlega gott, 6 gráður, andvari úr suðri og skýjað. Fórum Kópavogshring með smá sving að fyrstu brú í "Brúarhring" til að ná örugglega 20 km. Mættir voru Foringinn, Stefán, Hrólfur, Kalli, Magnús og undirritaður. Tempó var melló fyrstu 15 km, en síðan keyrt upp í 4:30 í pace og klárað síðustu 5 km þannig. Smá skipting varð að vísu á hópnum og með sameiningarjoggi gerði dagurinn 22 km. Góður dagur.

Það er þannig svo það sé tekið fram að það sem sagt er á hlaupum fer ekki lengra, en þar sem undirritaður var miðpunktur ákveðinnar umræðu, þá langar mig bara að ákveðið atriði sé skráð. Spurning "hvað ætlarðu að hlaupa hratt í London, Halli?". Svar "4,30!!!".... Ok, ok. glórulaust, sjáum til, einhverju varð maðurinn að svara og þetta hljómar vel, var svo sem ekkert búinn í smáatriðum að reikna út heildartíma en látum þetta standa og verða vitnað til.

Laugar, Höllin og ESB

2006-02-10T10:22:00.000Z

Var með smá lumbru í gær svo ég ákvað að 6 stiga frost væri ekki sniðugt meðal og fór því í Laugar í gærkvöldi og tók 40 mínútur á fínu tempói og lyfti á eftir. Ágætt að lyfta smá, þó ákaflega þyki mér það leiðinlegt.

Í kvöld var inni æfing í Höllinni þar sem teknir voru 2*800, 5*400 og 2*200 metrar, með hring á milli rólega og hálfri mín. í kvíld. Síðan 5 hringir voða frjálsíþrótta eitthvað, loks 5 hálfsprettir með háum hnélyftum. Þetta gerði rúmlega 7 km, ég hljóp rúma 3 á bretti á undan, svo þetta gerði bara góða 10 km. Hörku æfing - Hrólfur var ansi erfiður viðureignar og verður að viðurkennast að hann hafði miklu oftar betur en ég í kvöld.

Hvenær ætla Sjálfstæðismenn að fara koma sér upp úr hjólfarinu varðandi ESB? Blessaður forsætisráðherra vor gerist spámaður fyrir árið 2015 og gerir ráð fyrir Íslandi inn í ESB á þeim tímapunkti. Sjallarnir sjá þessu allt til foráttu líkt og Vinstri grænir... hvaðan hefur gott komið til þessa lands síðustu 15 árin á öllum sviðum - frá ESB. Frjálsræði á öllum sviðum atvinnulífs og mannlífs, aldrei.. aldrei hefur íslenskt þing verið í farabroddi í lagasetningu (jú ok.. ég skal viðurkenna Fæðingarorlofslögin). Við gætum kanski fengið öl og léttvín á viðráðanlegu verði ef við færum í ESB, við gætum kanski fengið húsnæðislán á 2 - 3% vöxtum, við hefðum ekki gengisáhættu upp á 20 -30% innan sama ársins, við hefðum ekki viðskiptakostnað vegna krónunnar, við fengjum kanski erlenda fjárfestingu (innrás í stað útrásar) inn í íslenskt atvinnulíf aðra en v. niðurgreiddrar orku, við kæmum að borðinu þar sem ákvarðanir eru teknar og fleira og fleira. Svo segja menn "á að innleiða ládeyðu í efnahagslífið eins og á Ítalíu og Þýskalandi.." "Nei menn ætla að nýta tækifærin eins og Írar og Finnar". Það er alltaf sama sagan hér á landi þegar menn standa frammi fyrir grundvallar ákvörðunum sem snerta samfélagið almennt að sagan virðist sjaldnast gera þá neikvæðu að þeim sem hefðu átt að ráða. Við áttum ekki að fara inn í EFTA, við áttum ekki að leyfa bjórinn, við áttum ekki að leyfa áfengisútsölu á Húsavík (ég kaus tvisvar, fellt og síðan samþykkt, þekki engan í dag sem segist hafa kosið "Nei"), við áttum ekki að taka þátt í EES. Hverjir vilja kannast við það í dag að hafa haft þessar skoðanir og hefðu betur fengið ráðið???

Enginn tími..

2006-02-07T20:57:00.000Z

Klassíks mánudagsæfing í gær hjá Skokkhóp Fjölnis. Hringur í hverfinu þar sem farið er niðurundir sjó og síðan upp í rúma 80 metra í húsahverfinu og aftur niðurundir sjó. Veður snilld, mínus ein gráða, logn og bjart. Gerði mér æfinguna svolítið erfiða með því að koma aðeins of seint og þurfa að hlaupa á 4 í pace í 10 mínútur til að ná fremsta hóp, byrja svo að masa við félaga mína sem ekki héldu í við fremsta hóp til lengdar og missti hann því aftur í burtu og þurfa því aftur að keyra upp til að ná fremstu mönnum. Þetta var helv... puð. Með smá tangarviðbót gerði æfingin nákvæmlega 12 km. Ekkert hlaupið í dag, lengi kanski á morgun til að bæta það eitthvað upp.

Heyrði í ungum framsóknarþingmanni á RÚV í dag, Birki Jóni Jónssyni í rökræðum við þingmann Vintri grænna. AAArrrrrg, er þetta nokkuð smitandi þessi álinflúensa sem virðist hrjá margan framsóknarmanninn um þessar mundir. Drengurinn virtist eins biluð grammafónsplata þegar kom að framtíðarsýn fyrir íslenskt atvinnulíf - álver og ekkert annað en álver skal það vera.

Hlustaði á Ágúst Guðmundsson í Kastljósinu áðan. Það var heldur viðkunnarlegri framtíðarsýn hjá honum fyrir íslenskt atvinnulíf og möguleika þess, heldur en framsóknarmanninum unga. Ég ætla rétt að vona að þegar maður eins og Ágúst stígur fram með hugleiðingar sínar, að grundvallar umræða geti orðið í þjóðfélaginu um hvert ber að stefna í þessum málum, og mega stjórnmálamenn algjörlega láta sitt eftir liggja fyrst um sinn........... og hlusti.

Langur laugardagur

2006-02-06T13:38:00.000Z

Það var alvöru á laugardaginn - 29 km, segi og skrifa. Veður var gott, hægur vindur, skýjað og 9 gráður. Foringinn lagði línurnar með lengd og leið og þá hlýðir maður bara. Sumir voru að ýja að því að það leggði smá áfengiskeim af hópnum og getur undirritaður ekki svarið það af sér að eiga þar nokkra sök, en alls ekki alla. Túrinn gekk vel og var miklu léttari heldur en 27 kílómetrarnir um síðustu helgi. Það á víst að fara talsvert styttra næst, það verður fínt.

Ég verð seint sakaður um að vera sérstakur aðdáandi Silvíu Nótt, en lagið hennar ber nú höfuð og herðar yfir þessa meðalmennsku sem þessi júróvision lög eru, síðan var sjóvið hjá henni flott. Mér finnst eiginlega með ólíkindum hvað þetta eru slök lög upp til hópa og flutningurinn í mörgum tilfellum afleitur og minnir í mörgu á forkeppni Idol, þar sem ennþá slæðist fólk sem varla heldur lagi. Hér á gullaldarárum júróvision voru lögin miklu sterkari, sem dæmi má nefna að klassikerar eins og "Með vaxandi þrá", "Lífsdansinn" og "Látum sönginn hljóma" áttu á brattann að sækja, en mundu rúlla þessu upp núna.

Svona fór um sjóferð þá..

2006-02-03T13:26:00.000Z

Ég tók þá skynsamlegu ákvörðun í byrjun seinnihálfleiks í leik Íslendinga og Noregs að stökkva út og ná æfingunni inni hjá Erlu. Ég gef ekki eitt né neitt fyrir heppni og óheppni í íþróttum, fólk uppsker eins og það sáir, þannig hanga hlutirnir saman. Að þessu sögðu er nú samt ekki hægt að líta fram hjá, að afföll íslenska landsliðsins voru okkur dýrkeypt þegar upp var staðið. "Strákarnir okkar" eiga framtíðina fyrir sér, liðið er ungt og má fara gera ráð fyrir heimsmeistaratitli með sama lið í kringum 2010. Þegar sænska landsliðiði sló gegn voru flestir í kringum þrítugt, þeir spiluðu svo í 10 ár í viðbót.

Töff æfing hjá Erlu. 10 * 400 m. sprettir og ýmsar æfingar í lokin. Hljóp þá alla á undir 1:20, þó ég sé nú ekki að upplifa mig sem neina létta vöru í augnablikinu. Smá keppni milli okkar Hrólfs í lokin sem endaði í gríðarlegum endaspretti, myndavélar náðu þessu því miður ekki og því verður aldrei sannað hvor var á undan. Ég átti síðan reyndar einn sprett eftir ásamt Kalla Hirst sem ég hélt að væri vinur minn og mundi hlaupa rólega með mér (ég var enn að tína lungun upp af brautinni). Nei það var auðvitað anað af stað og mér síðan velt upp úr því að hafa náð að halda í við hann.

Það er von...

2006-02-01T22:14:00.000Z

Tók 10,5 km hring í kvöld frá Laugum. Nokkur vindur, 9 stiga hiti og rigning. Var ferlega þungur og ekki bætti tap landsliðsins í handbolta um betur. Jæja strákarnir voru nú spila eins og englar lengstum. Gríðarlegt áfall að missa Einar út og hægra hornið orðið ansi bragðdauft. Ég geri ráð fyrir að einhverjir spekingar munu velta því fyrir sér, hvað Þórir hafi verið að gera þarna út ef ljóst mátti vera að hann hafi ekkert í þennan bolta að gera. Ekkert hægt að sakast út í Ásgeir Örn þó hann hafi kanski ekki verið að sýna sinn besta leik, eftir eina æfingu með strákunum. Nú nú, þessu var ég svo sem öllu búinn að spá, þannig að hér er ekkert óvænt. Nú er bara spurningin hvort sigur á morgun gegn Noregi muni duga. Serbar gefa Króötum ekki neitt, svo þar er smuga. Danir eigja von svipaða okkar, en þá verða þeir að leggja Rússa og markamunur okkar og dana er eitt mark. Það er von!

Vámaður, spámaður...

2006-02-01T00:00:00.000Z

Ok.. ég gerði ekki ráð fyrir að þetta yrði svona létt 34 - 32, ég spáði 34 - 33. Var aldrei í vafa með þetta samt, Rússarnir eru þungir og henta okkur ágætlega, en ég hef vissulega miklar áhyggjur af morgundeginum, en vona að þá komi í ljós að ég hafi ekki hundsvit á handbolta. Við munum samt óháð því hvernig fer á morgun komast í undanúrslit, svo pantið far í hvelli, þið sem eruð að spá.

Tók 10 km á bretti áðan, náði að sjá tvö mörk hjá Middlesboróg og Sönderland, Fréttir á RÚV, talsvert af Spúkks og Djötsing Eimí á meðan ég hljóp. Það var tiltölulega fátt í Laugum og greinilegt að janúarátökin eru byrjuð að falla í gleymskunnar dá hjá ansi mörgum. Þá eru nú gott að vera svona agaður hlaupari sem mætir reglulega með sínum hóp... bla bla bla.

2006-01-30T23:54:00.000Z

Flottur dagur í dag, logn og 7 stiga hiti - frábært. Enda sá maður það á hlaupafélögunum, svolítið eins og kýrnar á vorin, masandi á 4 - 4:30 tempói í startinu þegar á að fara tiltölulega rólega út. Ok, ok... ég er ekki skástur, en þetta var hörkuhlaup í dag, þar sem hlaupið var á undir 4 í tempói töluverðan tíma - veðrið. Hringurinn lagði sig á 10,5 km.

Sá að mínir menn í Aston Villa mæta Man City á Villa park í bikarnum, tökum þá í bakaríið.

Ég vil taka fram varðandi spána mína fyrir morgundaginn að gert var ráð fyrir að Ólafur nokkur Stefánsson yrði með.

12 vikur til London í dag

2006-01-29T23:08:00.000Z

Þetta var erfitt í gær, 25 km á dagskránni, ekki hlaupið svona langt síðan í New York maraþon 2004. Hljóp með Larsen-hópnum og farið "með ströndinni" hringur, veður bærilegt, gekk á með skúrum og svolítill vindur á Ægissíðunni og 7 gráður. Hlaupið hefði betur verið 25 km, því það endaði í 27 og síðustu tveir voru eiginlega ferlega slæmir, þar sem ég stífnaði agalega upp og geri ráð fyrir að "Frankenstæn" hafi litið út eins og Olga Korbut miðað við mig, þegar ég brölti síðustu metrana heim að Laugum.

Jæja "strákarnir okkar" okkar á leið í milliriðilinn með 3 stig, það er glæsilegt. Spái eftirfarandi úrslitum:

Ísland - Rússland 34 - 33, ég veit þetta er bjartsýnt, en ég er bjartsýnn maður
Ísland - Króatar 28 - 30, því miður það gengur ekkert á móti Króötum
Ísland - Noregur 33 - 28, þetta er náttúrlega borðliggjandi.
Og þetta þýðir að við erum komin í undanúrslit. Ræði það síðar.

Jæja þá er alvaran virkilega skollin á í undirbúningi fyrir London, 12 vikur til stefnu og formið svona la la. Hef ekki stórar áhyggjur af því, 12 vikur er langur tími og því á margt eftir gerast fram til 23. apríl. Grundvallar hugmyndafræðin fyrir vikurnar liggur fyrir, þar sem tilviljun verður ekki látin ráða hvað gerist á hverri æfingu, heldur skal hún hafa vel ígrundað markmið. Ég veit þetta er djúpt, svona verður lagt upp með þetta. Ég setti 3:15 á skráningarblaðið hjá Möttu sem áætlaður hlaupatími, nú er bara að vona þessir ca. 900 km sem hlaupnir verða á næstu vikum dugi til einhvers.

Strákarnir okkar

2006-01-26T22:09:00.000Z

Jæja þá eru þeir mættir leiks, "strákarnir okkar". Heldur skemmtilegra að tala um "strákana okkar" heldur en landsliðið í handbolta. Ég afsaka nákvæmnina í spánni frá í morgun, enda kanski ekki hægt að gera ráð fyrir að maður sé mikill spámaður, þar sem ég er ekki erlendis.

Tók eldsnögga inniæfingu að leik loknum. Félagarnir komnir í magapuðið hjá Foringjanum, sem gaf sé þó tíma að leggja línurnar 10 * 600 m. tempó með smá rólegheitum á milli. Var þarna einn með 10 ára krökkum að spóka mig í þessari glæsilegu frjálsíþróttahöll. Með upphitun og lokajoggi, gerði æfingin 10 km, sáttur en svolítið þungur.

Ísland 34 - Danir 30

2006-01-26T11:00:00.000Z

Suma daga er erfiðara komast í hlaup en aðra, það var einn af þeim í dögum í gær. Planið var seinniparturinn, en þar sem 4 ára dama passar sig ekki sjálf komst ég ekki baun. Umrædd dama átti síðan að vera sofnuð á skikkanlegum tíma svo hægt væri að fara út ca. hálftíu, en hún var ekki á þeim náttbuxunum í gærkvöldi og var ekki sofnuð fyrr undir ellefu. Góðir grannar létu ekki þessa tímasetningu trufla sig og komu mér til hjálpar og gat ég stokkið út kl 23:15. Veður var gott og enginn að trufla mig á stígum borgarinnar svo ég tók það tiltölulega rólega út en hratt heim.

Annars er maður í töluverðum bobba núna, þar sem landsleikur Íslands og Serbíu hefst klukkan 17:00, en gæða inniæfing hjá Erlu klukkan 18:00. Arrrrrrg ég þoli ekki svona vesen. "Bæ ðö vei" Ísland 34 - Serbía 30

2006-01-24T22:46:00.000Z

Ég var að lesa febrúarhefti af Runners World og sá þessi líka rosalega góðu tips, hvað væri “Inn” og hvað væri “Át”. Nú eitt er, að það er “Át” að hlaupa daglega, en “Inn” að hlaupa annan hvern dag. Og það auðvitað hentaði mér ágætlega í kvöld, hafði engan tíma í planað kvöld hlaup, svo því var bara skippað. Annars er þetta eintak gríðarlega fróðlegt og kennir þar ýmissa grasa sem ég kanski deili með ykkur síðar ef tóm gefst til.

2006-01-24T08:44:00.000Z

Mánudagur á líðandi eins og það heitir, hlaupnir 10,5 km, veður gott, svolítill snjór en samt ágætis aðstæður. Ég veit náttúrlega ekkert hvort maður á að voga sér að vera blogga hér, skilst á Mogganum að málfarið sé að fara þráðbeint til andsk..., og það sjáist einna skýrast á blogsíðum landsmanna. Jæja ég tek sénsinn.

Fékk hringingu frá stuðningsfólki Björns Inga (framsóknarmanni) í gærkvöldi og var spurður hvort ég vildi ekki styðja hann í prófkjöri framsóknarmanna. Það var ekki flókið að tilkynna að fátt væri mér fjær lagi. Sem minnir mig á það að ég virðist með einhverjum hætti hafa komist inn í bækur framsóknarmanna þegar ég fluttist til landsins árið 2000. Þarf að fara drífa mig í að láta fjarlægja mig þaðan. Spurning hvort einhver ábyrgðarmaður er skráður fyrir skráningunni á mér, svo ég geti fundið út hvernig svona gerist?

2006-01-23T10:04:00.000Z

Fór með Larsen-hópnum á laugardaginn, mættir, Foringinn, Stefán (seinn), Gautur (ennþá seinni), Kalli og Maggi. Ákváðum að taka ca. 20 km hring og negldum það upp á metra. Fínt hlaup, veður ágætt, smá vindur í lokin og hálka svona í það mesta á leiðinni heim. Hitaveitustokkurinn reyndist ekki jafn góður og við héldum. Alltaf jafn merkilegt með suma bílstjóra hvað við hlauparar erum annaðhvort ósýnilegir eða bara fyrir. Í rólyndisgötu í Gerðunum, kemur 3 tonna jebbi og við neyðumst til að taka götuna nokkra metra og hvað gerir hann, víkur svona metra eða tvo frá manni (engin önnur umferð í gangi), nei við skulum hafa það svona 30 cm. og þetta rétt sleppur. Fíbbbbbbl!!!.

Mögnuð æfing og mislagðar hendur..

2006-01-20T16:30:00.000Z

Foringinn reddaði okkur í Fjölnishópnum æfingu inn í nýju Frjálsíþróttahöllinni í Laugardalnum í gær. Þvílík snilld og unaður, þó ég minnist nú ekki á hve auðveldur Hrólfur var í lokasprettinum, en það er nú önnur saga. Hituðum upp sjálf úti og þar sem ég var með seinni skipunum, þá náði ég rétt 3,2 en hafði ætlað 4 km. Síðan hófst píramýdaæfing inni 200-400-600-800-600-400-200 og brýndi Foringinn fyrir okkar að missa okkur ekki í keppni og vitleysu, sem við gerðum að sjálfsögðu ekki... allavega ekkert voða mikið. Það gæti alveg vanist að droppa þarna inn einu sinni í viku, yfir háveturinn.

Þvílíkur fjöldi þumalputta í einu landsliði, jæja kanski ágætt að landsliðið okkar taki "dávn-leik" fyrir mót en í móti. Ólafur Stefánsson í vinstra horni í vörn og Alander Petterson í stöðu bakvarðar - hvað var það? Hef nú samt ótrúlega trú á þessu liði, þannig að detti það í gírinn á HM, þá gæti verið nauðsynlegt að einhver keypti sómasamlega útgáfu af "Ó, guð vors lands" í Fríhöfninni, eins og briddsspilararnir gerðu um árið. En auðvitað gæti Flugleiðavél orðið að vera "standbæ" eftir riðlakeppnina.

Ég lagði bílnum mínum við höfuðstöðvar Þróttar og þurftu þeir sem þar löggðu að komast upp 23 metra brekku, til að komast af planinu. Þar var allt stopp og snaraði ég mér út úr bílnum ásamt nokkrum öðrum, eftir talsvert þóf, ákveðnir í að aðstoða ökumann sem þar var fastur. Þarna brösuðum við 4 fílefldir karlmenn við að ýta bílnum og höfðum eigi mikla fótfestu - hann hreyfðist ekki. Ekki hjálpaði það heldur mikið að ökumaðurinn var greinilega sterkur mjög og gat því ekki stutt varlega á bensíngjöfina svo aldrei fór bíllinn niður fyrir 6 þúsund snúninga, þrátt fyrir kurteisislegar ábendingar um slökun. Þetta endaði svo að ég spurði ko.... ökumanninn, hvort ég mætti ekki grípa í bílinn og hann(ökumaðurinn) mundi kanski bara labba upp brekkuna. Þetta var lítið mál og var ungur farþegi í aftursæti afar "impóneraður" yfir ökuleikninni, þegar bíllinn skreið af stað með lítilli hjálp. Má álykta eitthvað út frá þessari sögu? Já, það er ólan að bílaplan Þróttar og Laugardalsvallarins eru ekki tengd saman.

Nýtt upphaf

2006-01-20T11:54:00.000Z

Jæja þá er ég fluttur um set, af fjölmörgum ástæðum sem ekki verða tíundaðar hér.... jú jú, veljum eina af handahófi - Skilaboðaskjóða Gunnlaugs er hér og hann er mæstró í svo mörgu tilliti.

Hér er markmiðið að bulla að mestu upp hlaupa-aktívitet mín, en væntanlega munu hin ýmsustu hugðarefni og lífsins upplifanir, rata hingað líka.